Poukisa anpil jèn pèse sousi, nen, bouch, lang ak anpil lòt pati nan kò yo?

Anpil atitid nou remake lakay divès moun nan peyi a, sitou jèn yo, pa sispann atire atansyon epi pwovoke deba nan sosyete a. Apre tatouwaj ak djwèdlòk, pèsin (piercing) vin alamòd nan dènye moman sa yo, kote anpil jèn, fi kou gason mete zanno nan anpil pati nan kò yo.

Devan fenomèn sa a ki ap pran jarèt nan sosyete a, Redaksyon Ajans enfòmasyon Ted’Actu te deside al fouye zo nan kalalou pou jwenn rezon ki pouse jèn yo fè plis pèsin chak jou ki pase.

90% jèn, fi ak gason, ant 16 pou rive 30 lane nou pale, te bay prèske menm repons pou di nou yo fè sa  jis paske yo renmen l.

« Paran m yo dakò pou mwen fè plizyè twou nan zòrèy mwen paske m eksplike yo jan m renmen sa epi jan m ap alèz si m genyen yo. Mwen renmen pèsin, depi a 11 lane mwen te vle fè l. Men m te oblije tann mwen rive nan yon klas avanse », sa se deklarasyon Valérie, 17 lane ki fè 4 twou nan chak zòrèy li.

Si paran Valérie konprann li, se pat menm ka pou Cassandra, 22 lane, ki te oblije fè pèsin nan kò li malgre moun lakay li pat dakò.

 « Si se pou manman m ak papa m, mwen pa t ap janm fè plizyè twou nan zòrèy mwen ni pèse nen m. Yo te toujou di m bagay sa yo se bouzen ki fè yo », se sa etidyant nan syans enfimyè a di nou. «  Mwen te swete fè pèsin anpil e mwen renmen l. Nan sans sa, yon bon jou pandan m ap sòti lekòl mwen pase fè l e mwen rantre lakay mwen byen ta. Se aprè yon semèn granmoun yo te resi dekouvri sa. Aprè anpil tan ap joure m, yo rive ban m vag », se sa Cassandra konfye nou.

Lanmou pa sèl rezon ki pouse anpil jèn fè pèsin

Si pou plizyè nan moun ki pale ak nou yo se lanmou ki pouse yo fè pèsin, gen lòt ki avanse kèk lòt rezon pou jistifye chwa sa.

« Rezon Ki te pouse m pèse nen m se paske m wè nan mwen yon rebèl », dapre sa Payera deklare, pandan l di tou pèsin lan ajoute sou bote l.

Konsa tou, gen andikap pa rapò ak sa kèk moun panse sou estil sa. Nan sans sa, Payera fè nou konnen li alèz ak pèsin li malgre li jwenn anpil kritik, sitou bò lakay li. Men toutfwa, selon sa l di, kritik sa yo pa deranje l koz li se yon moun k ap viv sou pwòp planèt li.

Pami kritik yo, Payera di n moun bò lakay li konn di pèsin se estil pwostitiye.

« Men sa pa fè m ni cho ni frèt », dapre sa li ajoute pandan l di li baze sou estim li gen pou tèt li.

Rezon Payera yo pa menm ak pa Rebecca ki, non sèlman fè fè antèn nan zòrèy li (mete divès zanno), li mete zanno tou nan lang, lonbrik ak klitoris li.

 « Mwen mete anviwon 3 zanno nan lonbrik mw pou atirans. Dayè trè souvan, mwen pa mete rad ki kouvri tout kò m », se sa jèn demwazèl sa ki travay nan bwatdenui eksplike nou.

Li gen 2 zanno nan lang ki trè itil li nan moman ewotik yo, selon sa Rebecca, 24 lanne, rakonte nou.

 « Se pa mw ki pral temwanye sa. Men anpil gason renmen lè fi ki fè pèsin nan lang souse pou yo », pawòl li.

Pi lwen, san li pa woule lang li, li di nou :  « Mwen menm gen zanno pi ba pase lonbrik mwen. Sa vle di nan klitoris mwen. Mwen mete l pou plis eksitasyon, plis vayb lè m nan moman plezi ».

Epi li konfye n tou zanno sa pou kote l pozisyone a itil li anpil lè l ap mastibe, sa pote piman nan moman sa a.

Anpil Gason fè pèsin tou nan kèk pati nan kò yo

Fi pa sèl kategori ki fè pèsin. Depi kèk tan, nou abitye ak reyalite kote anpil jèn gason nan peyi a pèse zòrèy goch yo oubyen tou 2 zòrèy yo. Dènye tan sa yo, mesye yo emansipe. Yo pèse lòt kote.

« Mw te toujou renmen netwaye sousi m, fè ba ladan. Epi yon jou mwen di poukisa m pa mete yon zanno ladan tou, jan m wè gen lòt moun ki fè l », se sa Jameson k ap travay nan yon babèchòp di nou. Pi lwen, li fè konnen li pa regrèt li te fè sa, sitou paske anpil fanm di yo renmen wè l konsa, menmsi gen moun ki pran l pou omoseksyèl.

Si Calixte li menm pa pèse sousi l, li gen yon zanno bò bouch li. Daprè sa l eksplike, se aprè l te fin wè rapè Fantom gen yon zanno nan menm pozisyon an, li deside mete l tou. Sa rive jèn pwofesyonèl la retire bijou sa, tou depan de ki kote l prale, ki espas l ap frekante.

Opinyon yon pastè sou estil sa yo

James ki se yon jèn pastè, te pale avèk nou nan kad travay sa. Nou te jije l bon pou n pran opinyon yon kretyen koz anpil nan moun nou te fè entèvyou avè yo, te fè n konnen yo sibi anpil diskriminasyon nan men moun legliz akoz pèsin yo.

Nan ti lapawoli nou te gen avè l, pastè James di nou konpreyansyon l sou sijè sa varye. Nòmalman, li p ap di yon fi ou yon gason pa mete zanno ni tou li p ap di yon fi ki mete zanno pa konvèti. Men tou depan de rapò moun yo ak Bondye, sa konn entèdi, selon sa li presize.

«  Selon relasyon moun lan ak Bondye li konn entèdi l met bijou. Konsa tou gen gwo sèvant Bondye ki mete yo e Bondye itilize yo konsa », se sa dirijan legliz la eksplike nou.

Li te ensiste anpil pou di nou kesyon pèsin lan pa yon bagay entèdi. Jis tout bagay depan de relasyon moun lan ak Bondye. Toutfwa, selon pastè James, zafè fè antèn lan, fè pèsin (percing) lòt kote tankou nan lang, nan sousi, nan bouch, nen ak lòt pati, se egzajerasyon.