Depi lè pwogram sa kòmanse nan mwa janvye 2023 a, se plizyè milye moun ki soti nan 4 peyi benefisyè yo ki se Ayiti, Kiba, Venezyela ak Nikaragwa li deja pèmèt antre Etazini jan lalwa mande sa.
Pwogram « Humanitarian Parole » la, anpil moun rele « Pwogram Biden», gen plizyè etap esponsò ak benefisyè yo dwe franchi pou rive jouk nan otorizasyon vwayaj la, yon dokiman k ap pèmèt sitwayen youn nan peyi nou sot site la yo, antre sou tèritwa ameriken an san viza.
Pou ede lektè li yo konprann pi byen kèk eleman enpòtan sou pwogram nan, ajans enfòmasyon Ted’Actu te chita pale ak Mèt Eddy Laguerre ki se avoka espesyalize nan imigrasyon Ozetazini. Avèk li, nou pral gade kèk bagay yon benefisyè pa dwe fè, soti nan ranpli aplikasyon an pou rive nan otorizasyon vwayaj la.
- Pa itilize nimewo paspò ki ekspire nan moman esponsò a ap ranpli aplikasyon an
Gen anpil benefisyè ki bay esponsò a yon nimewo paspò ki ekspire lè l ap ranpli fòmilè a epi panse li ka korije sa pi devan. Mèt Eddy Laguerre kwè se yon move lide paske sa ka konplike dosye a lè w rive nan lòt etap pwosesis la pou w rive jwenn otorizasyon vwayaj la.
Selon espesyalis la, lòt bagay ki enpòtan, esponsò a ak benefisyè a dwe asire yo pa gen okenn fot nan aplikasyon an sitou nan non benefisyè a, dat nesans li, nimewo paspò li ak vil kote li fèt la.
- Pa bay yon adrès imel ou pa itilize lontan
Aprè esponsò a fin soumèt aplikasyon an, se sou imel benefisyè a otorite amerikèn yo ap kominike ak li pou rès suivi yo. Pou sa, Mèt Eddy Laguerre ankouraje benefisyè a asire li imel lap bay la fonksyone nòmalman.
- Pa fè tèt cho aprè aplikasyon an fin soumèt
Depi esponsò a fin soumèt aplikasyon an, benefisyè a ki swa an Ayiti oubyen nan nenpòt lòt peyi dwe pran pasyans pou tann repons otorite amerikèn yo. Espesyalis la eksplike pa gen ankenn kote li ekri se sèlman 90 jou tretman dosye a dwe pran paske responsab yo presize ant lè aplikasyon an soumèt la ak lè ou ka jwen repons la, sa ka pran plis pase 90 jou.
- Pa chèche fè aplikasyon an plizyè fwa
Kit se menm esponsò a oubyen yon lòt, benefisyè a pa dwe mande pou yo soumèt yon lòt aplikasyon pou li.
Otorite yo nan USCIS fè konnen sa ka mete dosye a an reta nan sistèm nan.
Mèt Eddy Laguerre di li konprann gen moun k ap tante bay tèt yo plizyè chans, men li eksplike si chak moun t ap double chans yo, sistèm nan t ap vin ankonbre epi li t ap egzije plis tan pou trete dosye yo. Se pou sa espesyalis nan domèn imigrasyon an kwè li t ap pi bon si chak benefisyè gen yon sèl aplikasyon.
- Pa kite esponsò a mete timoun nan menm aplikasyon ak gran moun
Granmoun nan ak timoun nan se 2 moun apa, alòs yo chak bezwen yon aplikasyon apa, kidonk aplikasyon timoun ak gran moun nan dwe fèt yon fason separe.
- Si w resevwa imel konfimasyon an epi ou ta wè gen yon erè enpòtan, benefisyè a pa dwe kontinye pwosesis la.
Non benefisyè a, dat nesans li ak nimewo paspò li gen anpil enpòtans nan tout etap pwosesis la. Se pou sa, Mèt Eddy Laguerre konseye tout benefisyè ki ta remake gen yon erè nan youn nan yo, pa kontinye nan etap pou kreye kont USCIS ak CBP a paske moun nan p ap ka vwayaje menm si l ta rive jwenn otorizasyon vwayaj la. Alòs, benefisyè a pa dwe itilize ankenn enfòmasyon ki pa kòrèk nan pwosesis la, toujou daprè avoka a.
- Si w gen 2 prenon, pa ajoute 2èm nan lè w ap ranpli fòm nan
Nan ka yon moun ki gen 2 prenon, lè l ap ranpli fòm nan pou ale nan « CBP One » nan, se yon sèl prenon ki ap parèt epi benefisyè a p ap bezwen ajoute 2èm nan paske li deja nan sistèm nan, daprè Mèt Eddy Laguerre.
Espesyalis la ajoute, siw rele « Jean Daniel Marcelin », kòm egzanp, li posib pou se Jean Marcelin ki parèt. Lè sa a moun nan p ap bezwen ajoute Daniel la.
- Lèw fini ak tout etap yo, pa kite 90 jou pase pou w pa vwayaje
Aprè w fin resevwa imel konfimasyon an epi fini ak tout etap ki nan pwosesis la ki debouche sou otorizasyon vwayaj la, otorite yo ap bay benefisyè a 90 jou pou l vwayaje ale Etazini.
Avoka espesyalize nan domèn imigrasyon an, Eddy Laguerre ankouraje benefisyè a pa kite anpil tan pase pou l pa vwayaje sitou akoz menas jidisyè ki plane sou pwogram nan apati mwa jen k ap vini la.
