Erling Haaland, meilleur joueur de l’année en Premier League
Eklips solè se youn nan evènman astwonomik ki pi kaptivan epi espektakilè nou ka obsève sou latè. Li rive lè Lalin nan pase ant latè a ak solèy la, pandan l bouche yon pati oswa tout pati limyè solèy la. Daprè previzyon yo, yon eklips solè anonse pou demen 8 avril la nan pati Nò nan Amerik la ansanm ak nan peyi Dayiti , men kisa w dwe konnen sou fenomèn sa.
1. Definisyon
Yon eklips solè pasyèl rive lè Lalin nan kouvri sèlman yon pati nan Solèy la, sa ki kreye yon lonbraj pasyèl sou latè. Kontrèman ak yon eklips solè total, kote solèy la konplètman bouche, yon eklips solè pasyèl kite yon pati nan solèy la vizib sou latè.
2. Frekans eklips solè pasyèl yo
Eklips solè pasyèl yo rive plizyè fwa nan yon ane, men vizibilite yo depann de plizyè faktè jewografik tankou pozisyon obsèvatè a sou latè ak lè nan jounen an. Se poutèt sa, se pa tout eklips solè pasyèl yo ki vizib nan tout kote sou planèt la.
3. Obsève san danje
Li enpòtan pou w obsève yon eklips solè ak bon prekosyon pou pwoteje je w. Gade dirèkteman nan Solèy la san pwoteksyon apwopriye ka lakòz domaj nan youn nan pati enpòtan nan je w ki rele « retin ». Sosyete ayisyèn ofralmoloji rekòmande manm nan popilasyon an pou yo itilize linèt espesyal ki fèt pou obsèvasyon solè oswa lòt aparèy pwoteksyon je sètifye.
4. Dewoulman eklips solè pasyèl la
Yon eklips solè pasyèl fèt nan plizyè faz : Yon kote, Lalin nan kòmanse kouvri tou dousman yon pati nan Solèy la, kote l kreye yon fènwa pasyèl jouk li pran lòt pati a, yon lòt kote, Lalin nan kòmanse deplase soti nan chemen Solèy la, sa ki senbolize fen eklips solè pasyèl la.
5. Siyifikasyon istorik ak kiltirèl
Eklips solè yo te atire atansyon ansyen sivilizasyon atravè mond lan. Anpil kilti te bay siyifikasyon espirityèl oswa relijye ak eklips solè yo. Sivilizasyon sa yo te konsidere eklips solè yo tankou yon evènman diven.
6. Enpòtans syantifik
Eklips solè yo bay bon opòtinite ak syantifik yo pou etidye solèy la epi rasanble done enpòtan sou li. Syantifik yo itilize eklips solè yo pou yo etidye kouwòn solè a, pwotiberans yo ak lòt fenomèn solè ki difisil pou obsève nan kondisyon nòmal.
