82 détenus libérés par le CG de Port-au-Prince Edler Guillaume
Lejitim defans se yon otorizasyon lalwa bay pou yon moun defann tèt li oubyen yon pwòch li pandan yon atak. Moun lan pou defann tèt li ka itilize tout mwayen ki nesesè pou sove nan ka espesyal sa. Nan ka lejitim defans lan, pa gen pèn ki prevwa menm si agresè a ta pèdi lavil pandan reyaksyon viktim lan.
Daprè dwa penal ayisyen an, gen plizyè kondisyon ki dwe reyini pou nou pale de lejitim defans. Tankou,dwa penal ayisyen an fè konnen, atak la dwe enjistifye, sa vle di san okenn motif valab, defans lan dwe fèt pou pwoteje tèt ou oubyen yon pwòch, defans lan dwe fèt tousuit aprè atak la, defans lan dwe yon nesesite pou moun lan evite viktim, sa vle di fòk se sèl solisyon ki te posib epi sa ki pi enpòtan nan sitiyasyon sa se pwopòsyonalite ki dwe genyen ant atak la ak defans lan, sa vle di, defans lan pa dwe pi grav pase atak la epi mwayen defans lan dwe egal ak mwayen atak la. Nan sans sa, si yon moun ap atake w ak kouto ou pa ka defann tèt ou ak zam, sinon nan ka sa pap gen pwopòsyonalite, men ou kapab itilize zam lan pou w fè agresè a elwanye san retire lavi l.
Kisa lalwa di sou koze sa ?
Se atik 273 ak 274 kòd penal ayisyen an ki trete dosye lejitim defans. Lejitim defans lan se yon koz iresponsablite penal ki pèmèt yon moun ki pa gen lòt chwa pou riposte oubyen defann tèt li pandan yon agresyon kont li menm oubyen yon lòt moun san riske okenn pèn.
Lejitim defans lan depi lajistis fin etabli li, retire tout responsablite penal otè yon enfraksyon menm si tout eleman yo ta reyini.
Pou gen lejitim defans ,atak la dwe reyèl epi iminan, atak la dwe enjis sa vle di agresè a dwe pa gen okenn rezon valab epi ripòs la dwe pwopòsyonèl ak agresyon an.
Lalwa prevwa lejitim defans tou si agresè a se yon byen lap atake tankou kay, machin, biznis elatriye. Atik 274 alineya 2 kòd penal la trete kesyon sa. Lalwa prevwa lejitim defans kont zak vòl, piyaj, vandalis kont byen mèb ak imèb.
Pou gen lejitim defans fòk ripòs la imedya
Si yon moun fin bat ou byen bat epi apre kèk jou, ou ta kwazel nan lari epi ou bat li tou, nan ka sa nou pa ka pale de lejitim defans paske defans lan te dwe fèt menm moman atak la te fèt la.
Si agresè a deside chape poul li epi ou tire dèyèl kan menm epi wete lavi l, se pa lejitim defans paske menas la te deja disparèt.
BJ
