Aktivite seksyèl, ki fè pati lavi anpil moun sou latè, gen bon kote li kote li bay plezi, konsa tou li gen faz anbarasan li. Dènye tan sa yo, deba pa sispann fèt nan sosyete a sou difikilte anpil gason genyen pou koulout yo kanpe, sa vle di, pou yo rive bande.
Redaksyon ajans enfòmasyon Ted’Actu te fè yon ti lapawoli ak Doktè Exama Jean Rodrigue Junior sou pwen sa. Konsa tou nou te mennen ankèt bò kote medam yo pou n rive dekouvri konsepsyon yo de yon gason k ap fè fas ak difikilte sa.
Temwanyaj medam yo
Majorite fi nou te pale, pat wè sitiyasyon sa twò grav, anpil nan yo fè nou konnen pi gwo konpòtman yo toujou genyen anvè gason ki nan pwoblèm sa, se ede l jwenn solisyon. Toutfwa, yo klè sou sa, pou yo ede yon gason nan nivo sa fòk yo renmen l anpil.
« Avan tou, konsepsyon m depann de enpòtans moun sa genyen pou mwen. Nòmalman, lè moun lan malad epi mwen renmen l, m ap konprann li epi ede l chèche solisyon ak sa. Men tou, si se yon lòt pwoblèm li genyen mwen p ap kite l desann kilòt mwen ankò », deklarasyon Nathalie ki gen 28 lane.
Toujou pou pale de eksperyans li sou pwen sa, jèn pwofesyonèl sa te konfye nou sa konn rive tou li santi l raz, lè sa lòt lide konn pase nan tèt li pou l ta al chèche yon lòt moun pou ba l plezi. « Se pa yon kesyon enfidelite, mwen renmen l se vre, men si tout jan m fè pou ede l sa pa mache, mwen oblije lage pye m », dapre sa l fini pou l di.
Stephanie li menm ki fè anpil rechèch nan domèn medikal te ajoute plis agiman sou pwen sa. Nan sans sa, li di nou pi souvan, gason an konn malad san l pa konn sa. Epi sa koz li pa chèche fè anyen kòm tretman.
« Mwen pa gen okenn pwoblèm ak gason an nan ka sa, mwen jis chèche koz la pou m ede l jwenn solisyon. Sa te rive m rankontre yon ka konsa. Mwen te jis bay moun nan remèd epi sa te rezoud », selon sa li konfye nou. « Mwen te ede l ak tout kè m. Mwen te fèl manje 3 gous lay vyolèt chak maten avan l bwose. Epi mwen te egzije l pou li byen manje tou », se sa jèn marye a te ajoute.
Dlo a pa koule yon sèl bò. Gen fi yo menm ki pa nan bagay sa ak gason. « Ah! Se youn nan pi move sikatris mwen. Mwen te rankontre yon bèl ti bway, yon ti diri san pay. Yon jou m prepare m pou m fè yon bon plimen. Mwen rive, fè lanmou epi lè pou misye fè penetrasyon bwa l pa janm ka di e mwen te gentan trè eksite, trè sou sa. Mwen fout li yon kalòt epi m mete rad mwen, m al fè wout mwen », se sa yon jèn konsè jounalis rakonte nou.
« Lòt fwa sa rive m. Mwen te tanpere m. Sa pa yon bagay ki fasil pou yon fanm dijere, sitou lè l bon sou plimen an », dapre sa li rapousuiv pou di. Dènyeman, mwen te bezwen pase yon anvi plimen, mwen al fè l ak yon moun. Kareman misye fin fè yon grenn ke ki pa menm dire, sa k pi raz la, li pa janm rekanpe pou yon dezyèm ke malgre tout efò m fè pou jilbriyis la leve. Yon vye sansasyon wi. E moun konsa p ap janm jwenn mwen ankò », pawòl konsè a.
Ant fi ki panse yon gason ki nan sitiyasyon sa dwe jwenn èd ak sa ki di yo pa annafè ak gason konsa, opinyon yo anpil. Men fòk nou presize, plis fi kwè nan pote èd yo, pa rapò ak kantite ki kwè gason sa dwe meprize.
*Rezon ki ka fè koulout la paka kanpe doubout *
Nan lapawoli nou ak Doktè Exama, li te jije l enpòtan avan nou pale de diferan rezon ki ka lakoz pwoblèm bann nan, pou li fè yon ti rapèl sou fizyoloji ereksyon lakay gason.
Pou yon gason antre an ereksyon (pou jilbriyis li leve), li ap bezwen yon kantite sifizan san ki dwe desann nan peni li epi san sa pa dwe retounen osi rapid paske fok li rete pou asire ereksyon an kenbe. Gason an ap bezwen tou pou diferan òmonn li yo travay byen tankou testostewòn, l ap bezwen genyen yon kantite libido sifizan e l ap bezwen yon eta espri estab ase pou sa fèt. Se tout yon sistèm ki dwe anplas pou sa fèt, dapre eksplikasyon jèn medsen an.
Malerezman pou yon rezon ou yon lòt, sa rive gen gason ki paka gen yon ereksyon nòmal epi estab, sa nou rele pwoblèm bann lan.
Koz yo anpil. Sou plan sikolojik, li ka lye ak estrès, mank konfyans, sousi pèsonèl, ansyen twomatis nan yon ansyen relasyon ak lòt ankò, toujou daprèe espesyalis la.
Yon lòt kote, li pale nou de koz òmonal tankou pwoblèm testostewòn. Konsa tou kèk maladi tankou dyabèt (sik). Kèk medikaman tankou medikaman ki la pou desann tansyon yo. Alimantasyon tou ki pa ekilibre. Moun ki gran alkol yo, obezite, mank egzèsis fizik ak lòt ankò.
« Testostewòn lan jwe yon gwo wòl pou estimile ereksyon kay mesye yo. Yo konn rele li òmonn libido. Si li pa sekrete an kantite sifizan li ka koze twoub ereksyon epi pwovoke yon libido redui lakay gason an, daprè presizyon responsab platfòm Sante Anba Tonèl la.
*Tretman anvizaje *
Anpil gason itilize plizyè opsyon pou konbat difikilte sa. Kit se medsin tradisyonèl ou syantifik.
Selon Doktè Exama, pa gen yon tretman predefini pou pwoblèm bann lan. Gason ki nan sitiyasyon sa dwe wè medsen, se li menm ki pral pwopoze yon tretman tou depan de koz ki fè l paka bande a.
Konsa tou, li presize alimantasyon ki gen anpil engredyan ka bouste ereksyon yon gason tankou : lay, bètrav, gwayav, tomat, ak jenjanm ki bon anpil.
Li enpòtan pou n presize gen gwo diferans ant bann ak andirans. Bann se ereksyon, jan peni an ka rete kanpe, rete rèd.
Epi andirans lan se kantite tan gason an ka fè nan rapò seksyèl la avan li ejakile.
