![Nen k ap senyen pandan epòk chalè, ki konpòtman w dwe genyen ?](https://tedactu.com/wp-content/uploads/2024/07/photo-output-4-19-850x560.jpg)
Pandan epòk chalè, gen anpil moun ki konn wè nen yo ap koule san malgre yo pa sibi okenn chòk ladan l. Gen anpil rezon ki kapab eksplike fenomèn sa tankou, chalè a kapab fè anndan tou nen an sèk, chanjman tanperati a, moun nan kapab dezidrate, alèji oswa ògàn respiratwa a resevwa twòp kouch chalè. Yon moun ki viktim nen senyen pandan epòk chalè, ki konpòtman li dwe genyen ?
Lè yon sitiyasyon konsa prezante, moun nan pa bezwen twò enkyete, nou pral dekouvri kèk mezi nou kapab pran pou n bloke san kap koule a epi retounen nan nòmal nou.
Yon moun ki wè nen l ap bay san pandan tanperati a cho anpil, premye sa li dwe fè se evite panike, chita yon kote epi bese tèt li tou piti yon fason pou l ka evite san an desann nan aparèy respiratwa li epi evite plis konplikasyon oubyen kreye lòt malèz.
Pandan san ap koule a, moun nan dwe peze anlè adwat ak agoch nen an ak lepous epi lendèks li pandan 10 jiska 15 minit, se yon metòd k ap pèmèt li aplike yon presyon sou veso kap mennen san nan nen an epi ki kapab anpeche twòp san soti anndan tou nen an.
Pandan moman san ap koule a, epi l ap peze 2 dwèt li sou nen an, li enpòtan pou viktim nan chache pran souf nan bouch, sa ap pèmèt li evite lòt panik epi lap pèmèt san an travèse ògàn respiratwa a pi byen. Aprè san ta fin kanpe, premye aksyon ki dwe poze se leve tèt li anlè epi fè vizaj la plis kanpe anlè yon fason pou bese presyon san nan nen an.
Nan sousi pou kontwole totalman sitiyasyon an, apre san fin kanpe, li enpòtan pou moun nan aplike yon moso twal mare avèk glas ladan l, li dwe metel sou nen an, sa k ap pèmèt veso ki mennen san an pa anfle epi kanpe nèt san kap koule a.
Li enpòtan pou moun ki viktim nan rete idrate, konsome anpil likid sitou dlo. Si nen an toujou ap senyen apre tout pwosesis sa yo, li enpòtan pou moun nan chache wè yon doktè prese prese.