Anpil fwa, yon moun konn rive « boule » epi adopte anpil move konpòtman ki pa apwopriye pou fasilite kò a geri vit. Pou ede lektè ak lektris li yo, ajans an liy Ted’Actu ap pataje kèk konsèy Medsen San Fwontyè nan peyi Dayiti ak doktè Berlindy René, ki se direktè klinik « Dayè », nan vil Jeremi, bay sou sa yon moun dwe fè ak sa li pa dwe fè si li rive boule.
Tou dabò, li enpòtan pou n konnen, boule a se yon lezyon nan po a oswa manbràn mikez yo nan kò a ki te rive ekspoze a yon gwo chalè osinon ki te an kontak ak yon ajan fizik oubyen chimik.
Sa w dwe fè si w boule ?
Dapre Medsen San Fwontyè, si rad ou pran dife, lage kòw atè epi woule pou ou kapab tenyen flanm nan. Si se yon ti boule, vide dlo frèt sou li pandan 15 minit.
Pa mete anyen sou boule a si se pa yon medsen ki preskri w li, pa fòse retire rad la sou boule a, pa pete glòb dlo yo. Si se nan kouran elektrik moun nan boule, nou dwe byen asire n kouran an koupe oswa moun nan pa gen kontak ak li ankò.
Menm si boule a ta parèt piti, anndan moun nan kapab grav. Nan ka sa a, li enpòtan pou n vlope moun ki boule a ak yon twal pwòp epi mennen li vit nan yon sant sante. Fòk nou pa tann 2 jou pou nou mennen moun nan lopital.
Sa w pa dwe fè
Medsen san fwontyè klè sou sa, gen anpil konpòtman ou pa dwe adopte si w gen yon moun ki boule nan anviwonman w oswa si se ou menm ki boule a.
Premye rekòmandasyon an se piga mete pat yo konn bwose dan an, lwil, sann po kokoye, sann po ze ni lalwa sou boule a.
An plis, pa fè melanj fèy pou mete sou boule a, Fè atansyon ak tout lòt pratik tradisyonèl nou konn tande yo di pou fè lè nou boule paske sa kapab gen vye konsekans pi devan. Li pi bon pou n ale pito nan yon sant sante ki espesyalize nan tretman moun ki boule.
Sou bò pa li, doktè Berlindy René pote kèk presizyon sou konsekans sa ka genyen si yon moun adopte kèk move pratik pandan yo boule.
Prezans lòt enfeksyon
Premye konsekans sa ka pote dapre doktè René, se yon move lijyèn ki kapab trennen dèyè l lòt enfeksyon nan pati kote moun nan boule a. Nan ka sa, sa pral mande pou trete ni boule a ni enfeksyon an.
Reta pou maleng lan sikatrize
Pou yon maleng rive sikatrize, fòk san nan kò moun nan kapab byen sikile pou pèmèt gen yon bon vaskilarizatyon, sa ki ap favorize sikatrizasyon an. Lè yon moun pran plezi mete nenpòt remèd sou yon boule, sa ka debouche sou enfeksyon ki limenm anpeche sikilasyon san an rive byen fèt.
Po donnen
Se youn nan gwo konsekans move pratik yo nan moman yon moun boule. Move lijyèn ak prezans enfeksyon kapab toujou debouche sou yon po ki donnen, menm si anpil fwa « po donnen » an konn rive fèt menm si moun nan kite doktè pran swen boule a. Nan ka sa, yo pale de yon « predispozisyon » moun nan te genyen pou l gen po donnen an.
