Akademi Kreyòl Ayisyen an òganize plizyè atelye sou chanjman ki dwe pote nan alfabè kreyòl la

Akademi Kreyòl Ayisyen (AKA), nan plizyè mesaj li pibliye sou paj Facebook li, anonse li deja òganize plizyè atelye travay nan divès depatman nan peyi a. Dènye a reyalize nan  Plato Santral sòti 3 pou rive 5 dawout 2022 a. Travay sa yo, daprè sa AKA a di, se pou chita sou estandadizasyon k ap fèt sou alfabè kreyòl la. Pou sa, enstitisyon an chita tande pwopozisyon plizyè pwofesè sou kesyon an.

Premye atelye travay ki te fèt sou sijè a se te nan Pòtoprens, nan depatman Lwès la, sòti jedi 9 pou rive vandredi 10 jen 2022. Dezyèm nan te dewoule Okap, nan depatman Nò, sèlmam nan dat vandredi 24 jen an epi pou dènye ki sot fèt la, se te nan Plato Santral. Li te dire 3 jou sèlman.

Premye jou a ki te mèkredi 3 dawout, Akademi an te reyalize atelye sa a nan vil Laskawobas. Nan jedi 4, li te ale nan vil Mibalè alòske pou vandredi 5 dawout la, dènye jou a, se te tou pa vil Ench. Pandan atelye nan kad travay sou estandadizasyon k ap fèt sou alfabè kreyòl la, Akademi Kreyòl Ayisyen an te tou pwofite chita pale ak plizyè pwofesè lekòl nan chak vil yo (depatman yo) sou divès chanjman ki dwe fèt nan lang kreyòl la.

Daprè sa enstitisyon an di nan mesaj li pibliye yo, pwofesè kreyòl nan depatman sa yo bat bravo lakontantman pou kalite travay sa a ki se, daprè sa yo di, yon pwen enpòtan nan avansman lang kreyòl la. Epitou, sa ki enpòtan pou nou di, travay estandadizasyon sa a, se suit premye rezolisyon Akademi an te sòti sou alfabè kreyòl la nan ane 2017.

Gen yon komisyon syantifik ki kreye pou atelye sa yo. Mesye Marcky Jean-Pierre, yon Akademisyen ki se tou prezidan komisyon syantifik la, di li konsidere tout pwopozisyon pwofesè yo fè nan kad atelye sa yo ki deja reyalize nan 3 depatman (Lwès, Nò, Plato Santral) nan peyi a. An menm tan, komisyon syantifik l ap dirije a pwomèt l ap pran an konsiderasyon chak grenn lide, remak oswa pwopozisyon patisipan yo fè yo, yon fason pou travay ki gen pou fèt nan alfabè kreyòl la ka byen fèt.