Direksyon santral polis jidisyè a, nan yon videyo li mete deyò lendi 19 dawou 2024 la fè tout popilasyon an konnen pa gen okenn lajan y ap bay pou fè yon sètifika polis oubyen kazye jidisyè, y ap sèlman bay ansanm pyès otorite yo egzije pou sa.
Pami pyès sa yo, DCPJ mande pou tout sitwayen ki vle fè yon kazye jidisyè oubyen sètifika polis, vini nan lokal DCPJ a ki nan zòn klèsin ak kopi ekstrè achiv oubyen batistè yo, kopi premye paj paspò valid, resepise ki koute 102 goud nan DGI epi ki pa ekspire, 4 bout foto idantite, si se pou medam yo fòk cheve yo natirèl.
Si kazye jidisyè oubyen sètifika polis la se pou yon moun ki deja nan peyi lòtbò dlo, li bezwen yon lèt konsila peyi kote li ye a, si se pou rezidans li bezwen dokiman an. L ap bezwen yon lèt azil si se pou demand azil.
Si moun nan an Ayiti epi l ta bezwen kazye a pou travay kote l ye a, li bezwen sèlman yon lèt travay, lè sa li pa p gen bezwen prezante premye paj paspò li.
Yon lòt kote, Direksyon Santral Polis Jidisyè a ajoute si yon moun vle vwayaje, l ap fè moun ki vle antre li a ekri DCPJ yon lèt, lap prezante ak orijinal lèt la, akonpanye ak fotokopi pyès moun ki vle antre li a.
Nan mesaj sa, DCPJ pwofite mande tout moun pou rete vijilan yon fason pou pa kolabore ak raketè ki pra l mande pil lajan pou fè sètifika polis oubyen kazye jidisyè a. DCPJ pwofite lanse yon pinga bay tout rezo raketè sa yo pandan l fè yo konnen lap rive sou yo san zatann.
