Kominote ayisyèn nan vil Chikago selebre jounen entènasyonal lang ak kilti kreyòl la

Sou inisyativ Konsila jeneral Ayiti nan Chikago, peyi Etazini nan tèt kole ak Dreamers Marketing Network, Créole Solutions ak SATIN, yon jounen aktivite te reyalize pandan semèn sa nan vil Chikago pou mete an valè lang ak kilti kreyòl la, kèk jou avan selebrasyon jounen entènasyonal lang ak kilti kreyòl la, jounen samdi 28 oktòb la.

« Ann valorize resous nou yo », se tèm ki kenbe pou selebrasyon sa nan okazyon entènasyonal lang ak kilti kreyòl la ane sa nan sant Griffin Bourdeau nan Chikago, peyi Etazini. Se konsila jeneral Ayiti nan vil sa ak plizyè asosyasyon nan kominote a tankou, kowalisyon òganizasyon  ayisyano-ameriken yo nan Chikago, « Dreamers Marketing Network », Créole Solutions ak Sosyete Agrikòl Touristik Ensditriyèl Nasyonal ki te vle make dat jounen entènasyonal lang kreyòl la ki se yon gwo pati nan idantite pèp ayisyen an.

Ayisyen ki soti nan lòt Eta nan « Midwest » la, tankou Indianapolis te reponn prezan sou kote kèk etranje tankou Nijeryan Ade Orowolo ki te prezan nan jounen aktivite sa ki te gen ladan l ekspozisyon pwodui atizanal, fwa gastwonomik ak konferans deba sou istwa epi enpòtans lang kreyòl la. Se te okazyon pou konpatriyòt ki soti Ayiti lontan te resouse yo nan manje peyi tankou ,Tchaka mayi, Pen Patat, Chiktay, pate aransò, diri djondjon ak poul peyi, nwa, griyo, elatriye. Patisipan yo pat manke felisite Kay Miss Food, yon restoran ayisyen nan Indianapolis ak Ketwin Company ki nan Chikago ki te prepare manje sa yo ak pwodui ki soti Ayiti, sa ki, daprè kèk patisipan,  remonte tout souvni lakay nan memwa yo.

Nan pwogram jounen espesyal sa te genyen tou konferans, kote plizyè sijè te debat sou divèsite kiltirèl kreyòl ak konpozan l yo avèk kòdonatè UEP nan ministè Kilti ak Kominikasyon, Jean Marie Gael Saint-Fleur ki te fè deplasman espesyalman pou aktivite a.

Avansman lang kreyòl nan sosyete ayisyèn nan pandan 12 dènye lane yo avèk Marleen Julien ki se PDG Créole Solutions ki te mete aksan sou fason pou n ekri kreyòl epi alfabè lang lan. Ansyen minis agrikilti,resous natirèl ak devlopman riral la, agwonòm Fresner Dorcin  te chita prezantasyon l lan sou opòtinite agrikòl, anviwonmantal ak touristik peyi Dayiti ofri.

Òganizatè yo bat bravo lakontantman pou reyisit kokenn chenn jounen selebrasyon sa nan vil Chikago epi anonse divès lòt aktivite pou kontinye bay tradisyon ak kilti ayisyèn nan jarèt.

Konsil jeneral Ayiti a nan Chikago, Youri Emmanuel salye epi felisite tout òganizasyon nan kominote a ki angaje yo nan batay pou kenbe vivan lang kreyòl la ak tradisyon peyi Dayiti yo malgre yap viv nan lòt peyi. Reprezantan gouvènman ayisyen an nan plis pase yon ventèn Eta nan « Midwest ameriken » an te pwofite pou kontinye preche linite ak solidarite nan mitan tout kouch nan kominote a.

Sou bò pa l, PDG Dreamers Marketing Network la, Ruth Estriplet pale sou enpòtans lang ak kilti kreyòl la nan kominote a. Madam Estriplet ankouraje paran ayisyen yo montre timoun yo pale kreyòl menm si yo pa fèt an Ayiti epi aprann yo kiltive lanmou pou peyi sa kote rasin yo chouke.

Li enpòtan pou n raple se UNESCO ki te dekrete jounen entènasyonal lang ak kilti kreyòl la depi 28 oktòb 1983. Depi Ayiti pase Gwadloup, Matinik, Sent Lisi pou rive sou zile Sechèl, se plis pase 10 milyon moun ki itilize lang kreyòl la pou kominike atravè mond lan.