Danje ki genyen nan pran medikaman san preskripsyon

Gen yon pratik nan sosyete a ki bay anpil kè sote, se lè yon moun deside pran medikaman san l pa t konsilte yon doktè anvan sa oubyen jwenn konsèy yon famasyen kredib. Se yon pratik ki kapab mete lavi moun nan an danje epi ki kapab pwovoke gwo konplikasyon ak risk pou l devlope lòt maladi.

Medikaman k ap vann lib e libè nan tout bak machann an Ayiti, san okenn kontwòl Ministè lasante, se yon bagay ki malerezman kouran. Medikaman sa yo, anpil fwa, konn kache sentom lòt maladi ki ka pouse moun nan al bwè rèmèd la. Sa konn pran anpil tan avan sentom nan parèt jiskaske pou l ta antre nan pwosesis chache tretman pou li.

Yon lòt kote, gen moun ki konn alèji ak yon seri engredyan ki nan yon medikaman san l pa rann kont, sa tou ki kapab gen reyaksyon ki grav sou sante moun nan.

Pran medikaman san konsilte doktè, kapab fè yon moun pran yon kantite medikaman ki, nan nòmalite pa ta dwe pran, se sa nou rele yon dozaj ki wo. Nou ka pran kòm egzanp, yon medikaman ki se 1 fwa pa jou pou pran l, poutan yon moun deside achte l san preskripsyon epi sèvi ak medikaman sa 2 fwa pa jou, se yon eksè ki kapab fè maladi a vin grav oubyen kreye lòt konplikasyon.

Anpil ayisyen panse yo konn medikaman ki bon pou tèt fèmal, vant fèmal, fyèv ki se kèk maladi moun genyen souvan nan sosyete a. Malerezman, pafwa  moun yo konn twonpe yo paske yon tèt fèmal, vant fèmal oubyen fyèv se kapab yon siy ki moutre gen yon pwoblèm ki la nan kò a men ki pa gen okenn rapò dirèk avèk youn nan pati sa yo. Pou dekouvri kisa l ye ekgakteman, fòk genyen konsiltasyon.

Egzanp yon medikaman ki se Ibipwofèn, anpil moun konn pranl pou kalme doulè, kont enflamasyon epi pou bese fyèv. Lè yon moun pran Ibipwofèn san rekòmamdasyon yon doktè, sa kapab gen efè ki grav sou sante moun nan, tankou li kapab devlope ” ilsè gastrik, atak dirèk sou entesten, pwoblèm renal, alèji ak twoub kadyovaskilè”.

Fenomèn sa pa konsène sèlman medikaman ki gen rapò ak medsin syantifik tankou, konprime, siwo elt… li gen pou wè tou ak medsin tradisyonèl tankou fèy bwa, ekòs bwa. Pafwa, nou gen tandans pran yon kantite fèy san kontwòl mete yo bouyi san kontwole kantite tan li fè ap bouyi nan  mobjektif pou rezoud yon pwoblèm, poutan gen yon pwoblèm ou genyen, dozaj ki bon pou li a pa mande pou fèy la bouyi men pito se bouyi dlo vide sou fèy la epi bwè dlo a.

Men pou w konnen kòman sa dwe fèt, fòk ou chache wè yon doktè fèy, se yo ki gen espesyalite nan preskripsyon remèd natirèl, menm si gen gwo deba nan sosyete a sou kesyon medsin syantifik ak tradisyonèl la, sitou nan kesyon metòd akouchman fanm ki ansent.

Li enpòtan anpil pou popilasyon an konnen danje ki genyen lè yo pa konsilte doktè oubyen famasyen anvan menm yo konsome yon medikaman, pou evite tout risk pou devlope konplikasyon ki pa grav oubyen lòt maladi.