« Ti listwa », sou platfòm enfòmasyon anliy Ted’Actu, se yon ribrik ki pote pou ou yon tranch listwa epi tou kèk konesans sou yon seri evenman ki pa t twò rapòte oubyen yo pa t bay twòp enpòtans.
Jodia nan ribrik « Ti listwa », n ap kanpe pèsonaj sa ki se Chaloska.
Nan kanaval nan peyi Dayiti, anpil moun konnen pèsonaj sa ki rele Chaloska. Poukisa yo toujou reprezante l epi kiyès li te ye ?
Charles Oscar Etienne yo plis konnen sou non Chaloska se te yon militè, yon jeneral ki te responsab gran prizon Pòtoprens. Se te yon kriminèl, yon nèg ki te fewòs anpil.
Se te yon zanmi, yon patizan fidèl prezidan Vilbrun Guillaume Sam. Se li ki te fè masak 27 Jiyè 1915 la.
Kisa ki te pase nan dat sa a ?
Jou ki te 26 Jiyè 1915 la, yon gwoup nèg ak zam ki te gen nan tèt li Charles Delva lanse yon atak kont palè nasyonal. Prezidan epòk la, Vilbrun Guillaume Sam kouri pran refij nan legasyon Lafrans lan.
Lè sa a menm, Charles Oscar Etienne, jan nou di w la ki se te yon patizan fidèl Vilbrun Guillaume Sam, egzekite 167 prizonye politik ki te nan Penitansye epi ki se te advèsè prezidan an.
Aprè zak sa, Chaloska te tante chape poul li anba reprezay popilasyon epòk la ki te ankòlè anpil. Li te kouri al kache nan konsila Dominiken an. Malgre sa popilasyon an te rive pran l epi ekzekite l anvan yo trennen kadav li nan lari.
Depi aprè epòk sa a, yo reprezante Chaloska a travè yon seri pèsonaj degize, ki nwa anpil epi ki lèd anpil tou. Sa ki konn fè anpil timoun pè lè peryòd kanaval.
Se yon pèsonaj ak yon seri gwo dan ki mare sou bouch moun ki reprezante chaloska a. Li pase grès nwa sou po li pou fè pèsonaj la vin nwa anpil, li genyen yon mòso katon ki monte nan janb li ki ta reprezante bòt jeneral la te konn mete nan pye l. Anplis, li genyen yon seri bouchon kola k ap fè anpil bri chak fwa pèsonaj la deplase.
Degizman sa yo fèt pou montre Charles Oscar se te yon moun ki te nwa anpil, ki te gen gwo dan nan bouch li. Kòm se li ki te responsab prizon Pòtoprens lan, li te genyen tout kle selil yo sou li. Sa ki fè lè Charles Oscar ap vini tout prizonye yo te toujou konnen, paske pakèt twouso kle li te gen sou li yo te konn fè anpil bri sou li lè l ap mache.à
Avèk sipò Nappoléon Ninger.
