Fil wot tansyon yo se youn nan prensipal fòm enfrastrikti enèjetik ak konpozan prensipal gran rezo transpò elektrisite. Li pèmèt enèji elektrik ki sòti nan santral elektrik yo ale nan rezo distribisyon ki pèmèt kouran rive lakay nou. Liy sa yo souvan pase pa anlè. Toutfwa, lè yo tonbe, yo riske koze anpil dega tankou touye moun ak ensandi. Redaksyon Ted’Actu ap montre w kòman ou ka pwoteje tèt ou.
Se yon fenomèn ki rive kèk fwa nan peyi Dayiti ak rès mond lan. Fil wot tansyon konn gen tandans tonbe atè, sou kay ak machin. Sitiyasyon sa konn mete abitan yo nan gwo lapèrèz paske yo pa souvan konn sa yo dwe fè.
Depi yon fil wot tansyon an tonbe sou tè a, sou yon machin, elatriye, ou menm ki pre sèn nan, efè ondilasyon an mete w otomatikman an danje epi ogmante risk pou ou mouri oubyen andomaje selil nan kòw. Se pa sèl lè ou touche fil wot tansyon an ou kapab mouri.
Depi w nan perimèt 10 mèt kote fil wot tansyon an tonbe a oubyen w ap mache vin jwenn li ou kapab mouri. Yo rele efè a nan lang fransè « Potentiel de pas ».
Lè w nan perimèt liy wot tansyon an oubyen yon liy wot tansyon tonbe bò pye w, ou pa dwe kouri paske si w kouri vit w ap mouri vit.
Lè fil wot tansyon an tonbe, kouran an pwopaje atè a, li fòme yon sèk konsantrik. Depi w nan perimèt la, kouran an ap rantre nan yon pye pou l atenn tout kò w epi sòti nan lòt pye a. Tou otan li pran tan, se tout otan risk pou w mouri ap ogmante.
Nan sans sa, lè w nan perimèt yon liy wot tansyon, gen divès konpòtman ou kapab adopte nan lide pou ou evite ou mouri oubyen kò w sibi domaj.
Men an detay tout sa w dwe fè si yon sitiyasyon konsa rive :
- Fè yon fason pou ou kenbe tou 2 pye w yo kole ansanm; sote rapid ak tou lè de ansanm; bat pou yo tonbe sou tè nan menm lè chak lè w sote, jiskaske ou rive kite zòn fil wot tansyon an tonbe a.
- Ou kapab tou sote ak yon sèl pye. Toutfwa bat pou lòt pye a pa janm desann atè jouk ou kite perimèt la.
Dezyèm ka ki ka prezante
Si w fè aksidan ou ateri nan yon poto elektrik epi fil wot tansyon an tonbe, sa w dwe fè se :
- rete nan machin nan epi rele nan nimewo ijans pou pèmèt yon pwofesyonèl rezoud sitiyasyon an.
- Si machin nan ap pran dife, louvri pot machin nan; pa kite men w pran kote ki fèt an metal la;
- Fè yon so pou sòti nan machin nan men bat pou 2 pye w tonbe sou tè a ansanm. Epi aplike menm mezi nou site piwo yo.
