Mouye bwòs dan anvan ou aprè ou mete pat, kisa ki pi bon?

Se yon sijè ki souvan fè deba, konnen si w dwe mouye bwòs dan an, anvan ou aprè ou fin mete pat. Menm jan li fè anpil pale nan sosyete a, li pa diferan lakay espesyalis yo ki divize sou sijè sa.

Anpil moun toujou gen tandans rense bwòs dan yo anvan yo mete pat ladan l pou bwose dan yo. Yo konn fè sa sitou nan lide pou lave l si toutfwa li ta pran pousyè.

Pou n kòmanse, gen yon gwoup dantis ki dekonseye mouye bwòs dan an yon mannyè pou evite fil ki nan bwòs la vin yon jan mou epi pa ka byen fè travay netwayaj dan an. Gwoup sa rete kwè lè bwòs la sèk, travay la rive fèt pi byen. Toujou daprè gwoup dantis sa yo, lè bwòs la sèk la li pèmèt ou fè plizyè travay anmenmtan. Tankou, li pi byen retire kras ki nan dan an, li pèmèt ou elimine bakteri ki nan bouch la epi pèmèt ou goumen pi byen kont move lodè bouch la te ka bay.

Espesyalis sa yo ajoute, pat dantifris yo fèt yon fason pou se krache moun k ap bwose dan l lan ki rann pat la likid.

Yon lòt gwoup dantis yo men m konseye mete dlo sou bwòs la pandan l gen pat la menm si se tou piti, yon mannyè pou dlo a ka pèmèt pat la pi byen kimen.

Menm si gen divèjans ant 2 goup espesyalis sa yo, n ap note sèlman yo antann yo sou yon pwen ki dwe klè sou sijè sa, kit ou mouye bwòs la anvan w bwose dan an kit ou pa mouye l, lesansyèl se bwose dan w pou pi piti 2 fwa pandan yon jounen pou 2 minit chak fwa sa yo.