1) Selebrasyon Sen yo nan dat premye novanm nan jwenn orijin li nan uityèm syèk la ak Pap Grégoire III alòske se nan lane 998 ak 1031 aprè JeziKris, sou rèy Pap Leon IX, yon pèsonaj ki te rele Odilon ansanm ak Abbé de Cluny vini ak lide pou onore tout defen yo nan dat 2 novanm.
2) Nan peyi Dayiti, legliz katolik toujou itilize dat premye novanm nan pou yo adrese yo ak tout Sen. Se sa k fè, jounen sa yo deklare kòm yon jou ferye, selebre sou non « La Toussaint » ki soti nan mo laten « Totus Sanctus » ki vle di « tous les saints »
3) Aprè fèt sen yo, jounen ki vin apre a se fèt mò yo. Nan vodou ayisyen an, jou sa konsidere pou fèt gede yo. Pandan jou sa, Prèt ak metrès vodou yo òganize seremoni kote anpil nan moun k ap patisipe yo konn pase poud blan nan figi yo, mare tèt yo epi itilize boutèy piman pou lave pati jenital yo.
4) « Gede » yo se lespri lanmò, se sa ki lakoz fèt yo selebre toutswit apre fèt sen yo, kidonk menm jou fèt « lè mò a ».
5) Lè y ap pale sou « Gede », yo fè referans ak Bawon yo, tankou Bawon Samdi, Bawon kriminèl, Bawon simityè, Tipis Lakwa, Jean Simon Brutus ak Grann Brijit. Se nan simityè ou jwenn yo. Se sa k fè depi dat sa yo rive, simityè toupatou nan peyi a pa gen kote pou pike zepeng.
